Metrik fəzalar
\newcommand{\bbQ}{\mathbb{Q}}
\newcommand{\bbR}{\mathbb{R}}
X çoxluğunun hər x, y elementlər cütünə bu elementlər arasındakı məsafə adlanan və \rho(x, y) kimi işarə olunan mənfi olmayan ədədi qarşı qoyan və aşağıdakı şərtləri ödəyən inikas metrika adlanır:
1) \rho(x, y) = 0 yalnız və yalnız x = y olduqda,
2) \rho(x, y) = \rho(y, x),
3) \rho(x, z) \le \rho(x, y) + \rho(y, z).
Metrika ilə təchiz olunmuş çoxluq metrik fəza adlanır. X çoxluğunda təyin olunmuş metrikanı bəzən \rho_X ilə də işarə edəcəyik.
Nümunə. \bbR çoxluğunda x və y arasındakı məsafəni \rho(x, y) := |x-y| qəbul etsək metrik fəza alarıq.
Nümunə. C[a,b] çoxluğunda
\rho(x, y) := \max_{t \in [a,b]} |x(t)-y(t)|
ifadəsi metrikanın bütün aksiomlarını ödəyir.
Tutaq ki, X metrik fəzasında \{x_n\}_{n=1}^\infty elementlər ardıcıllığı verilmişdir. Əgər müəyyən a \in X elementi üçün
\lim_{n \to \infty} \rho(x_n, a) = 0 şərti ödənərsə, deyirlər ki, \{x_n\}_{n=1}^\infty elementlər ardıcıllığı a elementinə yığılır və bu
\lim_{n \to \infty} x_n = a \quad \text{və ya} \quad x_n \to a
kimi işarə olunur. Əgər \{x_n\}_{n=1}^\infty elementlər ardıcıllığı
\lim_{\substack{m \to \infty \\ n \to \infty}} \rho(x_m, x_n) = 0
şərtini ödəyərsə, belə ardıcıllıq fundamental ardıcıllıq (və ya Koşi ardıcıllığı) adlanır.
Çalışma.İxtiyari metrik fəzada hər bir yığılan ardıcıllıq fundamentaldır.
Əgər X metrik fəzasında bunun tərsi də doğru olarsa, yəni hər bir fundamental ardıcıllıq yığılarsa, belə metrik fəza tam metrik fəza adlanır.
Nümunə. \bbR tam metrik fəzadır. Amma bu fəzadakı metrikaya nəzərən \bbQ çoxluğu tam metrik fəza deyil. Məsələn, \pi ədədinin onluq yaxınlaşmalarından ibarət 3, 3.1, 3.14, 3.141, 3.1415, \ldots ardıcıllığı \bbQ metrik fəzasında fundamentaldır, amma bu fəzada heç bir elementə yığılmır.
Nümunə. C[a,b] fəzasında x_n ardıcıllığının x elementinə yığılması x_n(t) funksiyalar ardıcıllığının x(t) funksiyasına müntəzəm yığılması deməkdir. Müntəzəm yığılan kəsilməz funksiyalar ardıcıllığının limitinin kəsilməz olmasından çıxır ki, C[a,b] fəzası da tam metrik fəzadır.
Tutaq ki, X və Y metrik fəzalardır və x_0 \in X. Əgər f \colon X \to Y inikası
\forall \varepsilon > 0,\ \exists \delta,\ \forall x \in X,\ \rho_X(x, x_0) < \delta \colon \rho_Y(f(x), f(x_0)) < \varepsilon
şərtini ödəyərsə, bu inikas x_0 nöqtəsində kəsilməz inikas adlanır. Metrik fəzanın bütün nöqtələrində kəsilməz inikasa bu metrik fəzada kəsilməz inikas deyilir.
Əgər f \colon X \to Y qarşılıqlı birqiymətli inikası ixtiyari x və y elementləri üçün \rho_X(x, y) = \rho_Y(f(x), f(y)) bərabərliyini ödəyərsə belə inikas izometriya adlanır. Aralarında izometriya mövcud olan metrik fəzalara izometrik metrik fəzalar deyilir.